الطلاق وقطيعة الرحم

2017-02-15 18:43:57


كتب / نادية طاهر 

وصلتنى رسالة ...
إلى كل شيخ أزهري
الله يكرمك ، انتم مبتتكلموش غير عن الطلاق ليه؟ مفيش حاجة تانية في الشرع غير الطلاق؟ كل ده عشان قال الطلاق؟؟ طيب هو واحد قال الطلاق احنا ملايين بنقول قطع الارحام، هتسمعونا وتعملوا شرع ربنا في قضيتنا امتى؟؟
انت عارف ان العمام والعمات وولادهم ملهمش يشوفوا الولاد بقوة القانون؟ انت عارف الرسول كان بيحب عمه (المشرك) قد ايه؟ انت متخيل ان مفيش حد قال للرسول ماتكلمش عمك ولا تشوفه ولا حتى ربه؟ انت عارف لو كان حد من البشر اتجرأ وقاله كده كان هيعمل فيه ايه؟ انت عارف ان لما اخويا جه معايا الرؤية ابني معرفهوش وامه وخاله عملوا مشاكل عشان اخويا يمشي؟ انت عارف ان فيه ناس مقيمة فى مدينة ورؤيتهم في مدينة تانية عشان ابناءهم عايشين هناك وبينزلوا كل جمعة علشان الرؤية ويرجعوا من غير ماييجوا والمحكمة مش قادرة تجبرهم او تعاقبهم؟
انت عارف ان ابناءنا متضايقين من مكان الرؤية علشان بعض الاطفال المحرومين (ربنا يرزق اهاليهم يا رب) بيتلموا على لعبهم وبيقولوا مش ب يحبوا حد يتفرج عليهم وهما بيلعبوا؟ انت عارف ان صلة الرحم امر من الرحمن وانه لا طاعة لمخلوق في معصية الخالق علشان تقولوا ان الاستضافة لازم بموافقة الحاضن؟ انت عارف انهم مش بيجيبوهم الرؤية اللي المفروض انهم مجبرين عليها عالورق عشان يوافقوا عالاستضافة؟ انت عارف ان لو هم موافقين عالاستضافة مش هنحتاج نروح المحكمة أصلا؟ بالفكاكة كده!! انت فاهم انا بهري في ايه؟ الوووووووووو؟؟؟ طاب انت عارف ان الحضانة حتى يميز مش حتى يبلغ؟ انت عارف ان الطفل بيميز من ٧ سنين مش من ١٥؟ انت عارف ان الرسول قال للام انها اولى بابنها مالم تنكح (طبعا من ابوه لانها مكانتش بتختصم امها قدام الرسول مثلا)؟ انت عارف انه مقالهاش انها اولى بحضانته من امها ثم امه ثم اختها ثم اخته ثم اللي خلفوها ثم اللي خلفوه من غير مايجيب سيرته؟ انت عارف ان معنى كده ان ترتيب الاب التاني في الحضانة؟ انت عارف ان لما ربنا عطى الوصاية للرجال مقصش منها الوصاية التعليمية؟ انت عارف ان الرسول مقدرش يخلع الست من زوجها وان هو اللي طلقها لما افتدت بالمهر؟ انت عارف انهم ادوا للقاضي حق الرسول ماقدرش ياخده؟ انت عارف انهم بقوا بيشرطوا قيمة الشبكة دلوقتي في الجوازة ومبقتش هدية العريس للعروسة زي زمان ولا حاجة؟ انت عارف ان القوانين الوضعية للاحوال الشخصية غير شرعية؟؟ انت عارف اننا هنسألك يوم القيامة قدام ربنا عن قطع ارحامنا وعدم محاربة القوانين الوضعية وتصليحها؟ 
طاب اخر سؤال انت عارف ان انا اتخنقت منك؟! بجد بقى، ومش منك انت بس، من كل من في ايده يغير الوضع الشاذ اللي النسوان ركبت فيه عالرجالة ده وبقوا هم الاوصياء مش احنا وحارمني من ابني بقوة القانون وساكت..
حسبي الله ونعم الوكيل فيكم، اللهم اعمل شرعك يا رب وانتقم من كل من قاطع رحم اب او ام او وافق عليه او سكت عنه، انك ولي ذلك والقادر عليه..

#أطفالنا_رهائن_عند_قاطعي_الأرحام