هحلم

2017-12-01 19:59:52


 

_يلا يا ماما هنتاخر على الحفلة
_حاضر يا هنا حاضر خلصت اهو . لسة في وقت 
_فين شوز الباليه بتاعي يا ماما?
_اهو يا حبيبتي جهزيه والبسي الشوز بتاعك يلا يا أجمل باليرينا في الدنيا
*نزلت هنا مع اميرة(الأم) ركبوا العربية وراحوا مكان الحفلة أو عرض الباليه اللي هتشارك فيه هنا 
_يلا يا هنا وصلنا خلاص 
_حاضر يا ماما 
*اترفعت الستارة وظهر فريق الباليه اللي بتتقدمه هنا الطفلة الجميلة وقدموا عرض من أروع ما يكون
في انتظار إعلان نتيجة أفضل فريق من اللي اشتركوا في الحفلة

وظهر صوت الميكروفون ... ومقدمة الحفلة بتقول....
(نتشرف بتقديم جائزة أفضل فريق باليه بقيادة الطفلة المعجزة (هنا ايمن) )
*تقدمت هنا واستلمت الجائزة وعنيها بتلمع من الفرحة والفخر ....
..
...
...
...
..
.....في اللحظة دي صحيت هنا من النوم ونادت بصوت عالي 
_مااااماااا
*رد من برة صوت بلهفة 
_أيوة يا حبيبتي حاضر جاية حالا 
*دخلت اميرة مبتسمة وبتقول
_صباح الخير يا روح ماما 
_صباح النور يا ماما 
_يلا يا حبيبتي نقوم?
_استنى يا ماما اقعدي احكيلك حلم حلمته
_احكي يا هنا
*وبدأت هنا تحكي حلمها ..........وأنا يا ماما اللي استلمت الجايزة 
أنا كنت اشطر واحدة فيهم أنا كنت باليرينا يا ماما 
*اميرة بتبص لهنا نظرة كلها حزن وحسرة 
كسرت صمتها وقالت
_يلا يا حبيبتي نقوم?
_يلا يا ماما 
*لفت اميرة واتجهت لركن الأوضة ومسكت الكرسي المتحرك وقربته من سرير هنا وشالتها وقعدتها على الكرسي

*قعدت هنا مع مامتها على الفطار وصمت رهيب بيخيم على المشهد 
... قطعت هنا الصمت وسألت مامتها
_ماما... هي ممكن بنت تباة باليرينا وهي مش بتعرف تقف ولا تمشي?
*بصت اميرة لهنا وحبست دموعها في عنيها 
..طولت نظرة اميرة الصامتة وبعدين قالت...
_انتي ليه ماكلتيش كويس يا حبيبتي??
*ورجع الصمت للمشهد من تاني ورجعت هنا تأكل كميات قليلة جدا من الأكل وهي سرحانة 
*عدي الوقت ودخل الليل وجه معاد رجوع ايمن (الأب) من الشغل 
وصل ايمن البيت ودخل وقال لاميرة..
_مساء الخير يا حبيبتي
_مساء الخير يا ايمن حالا هحضرلك العشا 
*دخلت اميرة تجهز العشا وهي برضه سرحانة 
بدأت تحط الاطباق قدام ايمن وهي ساكتة تماما 
..خلصت وقعدت قدامه علشان يتعشوا وأيمن مستغرب جدا سكوتها وسرحانها 
_مالك يا أميرة?
رفعت اميرة وشها وعندها مليانة دموع وساكتة 
_مالك يا اميرة في ايه خضتيني
انفجرت اميرة في البكاء وقالت..
_هنا لسة بتحلم تكون باليرينا يا ايمن 
_نفس الحلم تاني??
_ وكمان طلعت الأولى في المسابقة واستلمت جايزة .. تخيل يا ايمن تخيل?
*رجعوا سكتوا لكن بيدور في دماغ كل واحد فيهم 100 سؤال

...ازاي اقدر أسعدك يا هنا?
..ازاي اقدر اخليكي تنسى الموضوع دا?
...لو اقدر اديكي رجليا يا بنتي !!
...يا ريت اقدر اتحكم في أحلامك وأبعد الحلم دا عنك تماما.

*نهار جديد ودخلت اميرة تصحى هنا 
_هنا يا حبيبتي يلا علشان المدرسة 
_صباح الخير يا ماما
_صباح النور يا قلبي 
جهزت هنا ونزلت اميرة توصلها المدرسة 
رجعت هنا والفرحة مش سايعاها

_ماما...ماما
_نعم يا حبيبتي
_في رحلة في المدرسة عندنا لعرض باليه حلو جدا والميس قالتلنا قولوا لماما وبابا 
*انصدمت اميرة وقالت لنفسها...

..تااااني ازاي أوديكي عرض باليه يا حبيبتي وانتى كدة??
اعمل ايه يا ربي ساعدني 
_صعب يا هنا يا حبيبتي المكان بعيد جدا
_لا يا ماما مش بعيد وكلنا هنروح مع بعض 
_يا حبيبتي وراكي مذاكرة مش هينفع
_عشان خاطري يا ماما وابقى عشان خاطري وافقي 
_طيب يا هنا لما بابا يرجع هقوله بس مش هيوافق 
_طيب بس قوليله يا ماما عشان خاطري 
_حاضر يا هنا بس نامي دلوقتي ونتكلم بكرة .
*رجع ايمن وحكتله اميرة كل اللي حصل واتفاجئت برده
_خليها تروح يا أميرة مش معقول هنحرمها كمان من حقها أنها تتفرج على حاجة بتحبها.. و يا ريت كمان انتي تروحي معاها تاخدني بالك منها

*دخلت اميرة في سريرها علشان تنام لكن وعنيها مفتوحة ودماغها هتنفجر من التفكير والخوف من اللي هيحصل 
لحد ما انتصر النوم أو بمعنى أصح أغمى عليها من كتر التفكير
*طلع النهار ودخلت اميرة تصحى هنا
_اصحى يا حبيبتي عاوزة اقولك خبر حلو
_صباح الخير يا ماما 
_صباح النور يا قلبي
...بابا وافق على الرحلة وكمان هروح معاكى 
_بجد يا ماما بجد?
أنا بحبكوا اوى اوى اوى 
*فاتت الأيام وجه معاد عرض الباليه 
وبدأت اميرة تجهز هنا لحضور الحفلة

_ماما.. لبسيني الفستان الأحمر دا أجمل فستان عندي وكمان انهاردة أجمل يوم في حياتي 
_اه وكمان ارفعيلي شعري لفوق زي الباليرينا 
_حاضر يا حبيبتي

*وصلت الرحلة لمكان العرض 
وقعدت هنا مع مامتها في أول صف علشان تقدر تتابع وتتفرج كويس 
..اتفتحت الستارة وبدأت الموسيقى وظهروا الباليرينات

.. وهنا بقت في عالم تاني .. تركيز رهيب مع العرض . خلاص مش شايفة غيرهم 
.. قامت اميرة من جنبها وهنا حتى محستش بيها
-راحت اميرة لمدرب الباليه وقالت له ..

_بنتي عندها شلل أطفال مولودة بيه وكل يوم بتحلم انها تكون باليرينا ...
أرجوك أنا ليا طلب نفذهولي
_اتفضلي يا فندم ازاي اقدر اساعدك?

_هخليك تقابلها وحاول تقنعها أنه صعب أنها تكون باليرينا بس من غير ما تجرحها 
_يا فندم بنتك عندها حلم ومهما حاولنا نقنعها مش هتبطل تحلم لحد ما تحققه 
..وأنا هخليها تحققه 
*استغربت اميرة جدا من كلامه وبصاله بدهشة ومبتتكلمش

_أنا عارف انك مستغربة لكن قبل أي حاجة أنا لازم أقابل بنتك ..
*خلص العرض وهنا في قمة الاستمتاع وبتحاول تقلد حركاتهم باديها

*راح المدرب وقرب عليها وقالها...
_انتي هنا?

_أيوة يا عمو أنا هنا 
_عجبك العرض يا هنا?
_اوى اوى يا عمو حلو اوى 
_تحبي ترقصي باليه زيهم? 
_ياااااه يا عمو نفسي ... أنا نفسي اكون باليرينا 
*لمعت عيون هنا وبصت علي رجليها 
ورجعت بصتله وقالت بصوت واطي...
_هو ممكن يا عمو?
_أيوة يا هنا ممكن أنا هعلمك وهتكوني أحسن باليرينا في مصر..

*خلص المدرب كلامه مع هنا وسابها وادالها ضهره 
جواه احساس مش قادر يترجمه 
فرحة بطفلة جميلة ولا حزن على ظروفها ولا قوة غريبة زرعتها فيه 
هو مش قادر يحدد 
وقال لنفسه....
_أنا ازاي اديتها الوعد دا???
_ازاي هقدر اوصلها لحلمها دا وأنا عارف انه مستحيل ?
_أنا فعلا لسة مش عارف هعمل ايه وهنفذه ازاي ...
أنا لو مقدرتش أنفذ هدمرها وادمر نفسيتها ...
*اتصل المدرب بصديق قديم له عنده فكرة عن حالات مشابهة لحالة هنا وبدأ ياخد منه بعض النصائح المهمة 
.. وبدأ يبحث على النت عن طرق التعامل وقرأ كتير كمان في الطب النفسي 
.. فضل أسبوع كامل في اجازة في بيته بيبحث ويسأل ويدور بكل بكل السبل اللي يقدر بيها يساعد هنا للوصول لحلمها 
:=وبدأ في الأول يهيا هنا نفسيا . أن مفيش مستحيل 
وإن الموضوع مش سهل لكن هنقدر 
... كان كل يوم بيقابل هنا ويهياها لبداية التدريب حركيا 
قدر يزرع فيها الأمل أكثر وصلها لأنها اندمجت مع فكرة أنها فراشة وروحها هي اللي بتطير ... روحها بترقص جواها

..... اتاقلمت هنا مع الفكرة 
وفعلا بدأ التدريب العملي على الباليه وهي على الكرسي بتاعها 
.. صحيح الموضوع مش سهل لكن إصرار هنا على تحقيق حلمها كان يستحق التعب 
الفرحة في عيون هنا وهي بترقص باليه .. ودموع اميرة وهي بتشوف بنتها قدامها بتحقق حلمها كانت كفيلة انها تضيع اي إحساس بالتعب بيحس بيه المدرب

... وبعد فترة راح المدرب لهنا وقالها ..

انتي دلوقتي تقدري ترقصي باليه زي أحسن باليرينا شوفتيها في حياتك 
..والاسبوع الجاي في مسابقة وهتدخليها..
أنا عاوز اتشرف بيكي يا هنا..
عاوز الناس تشاور عليا وتقول الراجل دا هو اللي كان بيدرب الباليرينا الجميلة اللي فازت بالمركز الاول دي

__حاضر يا عمو حاضر صدقني هعمل اي حاجة اقدر اعملها علشان حضرتك تكون مبسوط مني 
_خلاص يا هنا اتفقنا .. هندخل المسابقة

*عدي الأسبوع وبدأت اميرة تجهز هنا وتلبسها وسرحت شعرها لفوق وراحة المسابقة و معاهم باباها

*اترفعت الستارة وبدأ العرض وقدمت هنا عرض من اعظم عروض الباليه على مدار سنين كتير فاتت وهي على الكرسي المتحرك 
(وجه وقت اعلان النتيجة)

وظهر صوت الميكروفون ..ومقدمة الحفلة بتقول....

(نتشرف بتقديم جائزة أفضل فريق باليه بقيادة الطفلة المعجزة( هنا ايمن) )
وتقدمت هنا واستلمت الجائزة وعنيها بتلمع من الفرحة والفخر 
وسالتها مقدمة الحفلة 
_تحبي تقولي حاجة يا هنا???
_أيوة من فضلك
ادتها الميكروفون وقالتلها اتفضلي قولي
*اخدت هنا الميكروفون وقالت...

___أنا بس هقول اني

(هحلم)

 

__ نانيس جنيدي

ربما تحتوي الصورة على: ‏‏شخص واحد‏، و‏‏يبتسم‏، و‏‏‏نظارة شمسية‏ و‏لقطة قريبة‏‏‏‏‏




موضوعات ذات صلة