علشان يعدي الوقت .. شعر عاميه للشاعره "منار حسين"

2019-07-19 02:17:07


علشان يعدي الوقت : الشاعرة منار حسين

بكتبلك دلوقتي .. وانا روحي هلكانه
بقيت صاحب علل وماليش صحاب م البشر 
ولا حتي بني ادمين ، او ناس يكونوا السند 
الكل كان سايب وقت الشدد والحزن 
ومعتش غير علتي هي اللي بقيالي 

بكتبلك وعيني مش ساكته 
حالفه انها تدمع كل اما بفتكرك 
وكأنها مخصماني ، علشان مابتشوفكيش 

بكتبلك بكل اوجاعي 
اني خلاص تعبان 
مستني يوم موتي.

طب تعرفي كام مره زورتيني !
اقصد في حلمي اكيد .. 
مانا برضو مانستكيش
محاولتش ومش عارف 

كل الفراق كان سهل 
إلا فراق الروح 
وتملي كنت بقول 
انك ملاذ آمن والروح ترد الروح 
دلوقتي ليه مش هنا وتملي نسياني

بكل آسي الدنيا ..
قررت اتعافي 
قررت اموت دلوقت 
علشان يعدي الوقت 
وان جيت في يوم ع البال
أرجوكي إدعيلي ..!!