غريبة يا دنيا الألوان ...الشاعر . محمد مبارك

2019-10-22 00:32:09


((غريبة يادنيا الألوان))

بقلم"محمد مبارك"

بنرسم.. ضحكتين تايهين
بنفرح.. عادي هما يومين
بنزعل.. بس اهو عايشين 
وننسي.. العشرة والأيام
....
نقابل.. ناس وناس تمشي
نفارق.. مين مابيهونشي
نراضي.. برضه مايدومشي
ونرجع.. مافي بينا سلام  
... 
نداوي.. الجرح مايلمش
نحب.. الحب مايضمش
نحابي.. الفرح مايتمش
ونمشي.. نحايل الأحلام
...
زمان.. كان الحنين قاضي
سنين.. بتعدي عالفاضي 
بنهلك.. روحنا في الماضي
ونشتاق لو لأي كلام
...
ساعات.. الحزن بيطول 
نهار .. الجرح يتحول 
كتير .. الضلمة بتهول
وتقلب نور قلوبنا ضلام
.... 
يومين لا والله دول ساعتين 
بنكدب واحنا مش حاسين 
ونضحك ضحكتين تسكين 
بقينا في كدبنا فاشلين

نخاف الدنيا تلمحنا
ونرضي بالنصيب واحنا 
بنسحب روحنا من روحنا 
وادينا تمام اهو وعايشين 

غريبة يادنيا بتعاندي 
بتدي الناس وبتساندي 
وتيجي توقفي عندي 
(غريبة يادنيا الألوان)




موضوعات ذات صلة