اترهانوا عليا وكسبوا الرهان…؟!!

2016-03-24 16:46:47


المهم اتكلمنا عالفيس وبقينا نتكلم عالموبايل ولما لقيته بيتجاوز في الكلام لابسه ايه وهاتي بوسة والكلام الوسخ ده اديتله استمارة ستة صحيح كنت بسمع الكلام ويعجبني بس قلبي مش مطاوعني ارد المهم نفضتله
تمر الايام ويجي صاحبه يتعرف عليا بردو زميلي في الجامعة يبقي صاحب الولد القديم
نيجي بقي للغلط المرير الي انا وقعت فيه والي خايفه ومبنامش اليل منه.

حصل ايه بينا ؟ كلام علي الفيس ليل نهار وكان باين من نظرة عينيه انه معحب بيا و24 ساعه يكلمني كل ده اصحاب مفيش اي حاجه بينا وانا ثابتة على مبدأي باحترام
لحد ما في يوم جيه يقولي بهزار نتجوز عرفي !!!!!!

انا اتصنمت وقفشت جامد قالي انتي هبلة انا بهزر معاكي يا بنتي عرفي ايه ما علينا
يوم وري يوم بقي يتجاوز هاتي بوسه عايز اشوف شعرك افتحيلي الكاميرا اشوفك بشعرك وانا كنت بصده وبطنش وبقول خلييني ااجاريه واشوف اخره ايه ما يمكن يطلع بيختبرني وانا غبية ووقعت بقيت بفتح الكاميرا بشعري والله هما مرتين بس وبعت صورة وحده ليا بشعري مكنتش فاهمه انه كان عايز يشوف جسمي وبقيت بطنش الولد وخلاص وبقوله في وشه احنا كلنا بنضعف مينفعش كده بجد ويتجاوز بردو في الكلام تحت الهزار.

المهم دلوقتي تقريبا الولدين دول متراهنين عليا لقيت صاحبه القديم بيكلمني على الفيس بيقولي هتصل بيكي بقوله مشغولة قالي من امتا مشغولة يعني بس هعديلك بمزاجي تاني يوم كلمني صاحبه بيقولي ايه اسمع البلاوي.

النهارده كان زحمة اوي في الجامعة تموتي انتي في الزحمة والتحرش بهزار قلتله لا طبعا مينفعش قالي لا بالعافية وحش لكن لما يتفقو مع بعض يبقي ماشي اصله التحرش ده مزاج تخيلو !! وقعد يلمحلي انه في بنات محترمين بس نفسهم في كده يالهووي بيلقح عليا بالكلام انا هتجنن انا اقسم بالله ما في نيتي حاجه انا كنت بجاري صاحبه في الكلام عشان اشوف اخر والله لقيته بيقولي مفيش بنت دلوقتي مش عايزه الكلام ده تخيلو الكلام ده !!! كل الي عايز اقولهولك ان مش اي بنت تسيب نفسها لاي ولد لازم مواصفات خاصة يعني مش اي واحده واي واحد انا اتصدمت وسكت انا متاكد من الي بقولو ده يا بنتي بيقولي انا متاكد ان البنت بتضعف قبل الولد واكتر كمان بس هما البنات عاملين نفسهم محترمين وكلو بالاتفاق بينهم مش الكدب والخداع.

يالهوووي ايه اللكلام ده انا هطق وعلي فكرة مش لازم ينامو في سرير واحد ممكن احساس كده عالتلفون مثلا
الله يخليكو لاقولي حل قبل ما تقلب بفضيحه الولد ده بيجيب الكلام ده منين اكيد صاحبه قاله واكيد متراهنين عليا اناا الحقووني ولاقولي حل الله يكرمكو انا مبكلمش الولدين دلوقتي وانا هشوفهم في الجامعه الاسبوع الجاي خايفه حد فيهم يكون مسجلي او مسك عليا حاجه انا كل الي غلطت فيه صورة ليا وفتحت الفيديو كول للولد ده بس مرتين ايه الحل انا مبنامش من القلق مش عايزه تجريح فيا الي مكفيني.

صديقتنا العزيزة:

بدايةً: أسفة إني أقولك إن أسلوبك في عرض مشكلتك وكلامك لا يدل إطلاقًا على إنك بنت خام !!!!!!!

ثانية: أسفة بردو إني أقولك إنك كنت عارفة مصيرك إيه، تقدري تقوليلي يعني إيه حبيتي تجربي وتشوفي آخره أيه، ياترى إنتي كنت متوقعة تكون أخرته أيه، إنتي كنتي حابة كدة، وحابة تعملي كدة، وحابة تسمعي كلامه، وجارتيه بمزاجك بكل أسف.

إنتي أكيد متابعة الموقع ومتابعة الباب، وبتقرأي المشاكل اللي بتيجي يوميًا بدليل إنك بعتي مشكلتك، يعني ما خدتيش درس من كل المصايب اللي بتحصل للبنات من النت.

صديقتنا، أرجعي لربنا هو وحده سبحانه من يملك أن يخلصك من تلك المحنة، واتقي الله في نفسك وأهلك، وتوبي وخلي عندك إرادة إنك عمرك ما ترجعي للحاجات ديه تاني، واقطعي كل صلتك بالشباب ديه، واوعي تستسلمي لأي إبتزاز، وتجاريه في أي حاجة يطلبها منك، فاهمة كلامي كويس، وادعي ربنا ليل نهار يسترك ويقبل توبتك.

وأخيرًا أسأل الله أن يهديك ويسترك ويبعد عنك كل سوء، ويرزقك الزوج الصالح والحب الحلال، ويعصمك من الحرام.