صورة .. حروف للكاتبه " فاطمه العدلاني "

2020-02-27 22:59:39


فاطمه العدلاني 

في عُمر ..عُمرين
اخترلك صُحبة حبيب ..حبيبين 
في ساعة.. ساعتين
ااسرقهم من الزمن ليك
واضحك ضحكة.. ضحكتين 
في دقيقة دقيقتين 
قول كلمة كلمتين
في ثانية ثانيتين 
اخطفلك صورة صورتين
سيبهم ذكري ليك 
وقت خلافهم
وقت غيابهم 
وقت رحيلهم 
وقت  منِفسك بيك تضيق 
وقت محُزنك بيك يزور
وقت معُمرك بيك يطول
افتح صورك 
شوف ماضيك 
ليك ذكريات مع كل صورة 
مع كل ضحكة كان في حكاية 
تبان في الصورة ساكنه مش حكاية
وانت الرواية..ما انت معاك الحكاية 
وقت ما كانت البداية 
اما كانت الصورة بتتكلم 
لحظة قبل اللقطة متسكن 
وكله يرسم ضحكة ويتبسم
 كانت القاعدة تقول الضحك يطول 
والصورة لقطة لذكري 
لكن الذكري مش اللقطة وبس 
حكايات واغاني ومواضيع 
الشرح ليها يطول ويطول 
تقعد عمر تحكي شعور 
والاصل في الموضوع 
عمرك متقدر تصف شعور 
اصل اصل الحكاية مع ابطالها 
وابطال الصورة ابطالها
وان كان ابطالها غابوا 
سوا ان ان كان لهجره او قطع 
النتيجة واحدة 
انهردا مش امبارح 
الصورة اتخطفت 
واللقطه متتعادش 
والفرحة متتجزأش 
ريتنا عرفنا وقت الصورة 
ان الصُحبه بتغيب 
والايام بتروح ومبتعودش
وان الضحك بيخلص  
كُنا شيلنا ضحك لبكرة 
والفرحة من القلب مطلعتش 
لو وفرنا شوية ساعتها 
كان زمان الرصيد مخلصش 
او ممكن مكنش ساعتها 
بقت المرة الاخيرة 
نشوف فيها اهل وصُحبه 
بس الصورة لسه معانا 
فيها جزء من الحكاية 
ولو شعور الضحك غاب 
كفيلة رنة الضحك منها 
تطلع الف عتاب وعتاب 
كفيلة الصورتين 
يفكرونا بكلمتين
فنضحك ضحكتين 
وننسي عتاب عتابين 
وساعتها النفس تصفي 
ونعود بالماضي امبارح بكرة 
حتي لو العُمر غَيَّر فينا كتير
هنقعد مع صُحبتنا 
نلاقي لسه ارواحهم تشبهنا 
ونرجع زي زمان 
ونقول كان وكان وكان 
واه عالايام وعالزمان 
وياما كان لينا ليالي ايام
وياما جمعنا مكان ومكان 
ونشوف صورنا نقلدها 
يا ريت الضحكة بس فيها تصفي زي زمان ....