محتجالك .. حروف للشاعرة " حنين مصطفى "

2020-02-28 03:29:40


حنين مصطفى .. محتجالك 

المتاح دلوقتي فراقك 
انا مش عاوزه حاجه 
انا بس وحشتني اسمع صوتك
وحشنى كلامنا لوش الصبح 
كنت راسم على وشي الفرح 
وحشتنى لمعه عينيك لما بكون وحشاك 
انا كنت ديما سمعاك 
ليه بطلت تسمعنى 
خلاص يعنى 
الفراق بقي عاده 
الجرح
انا قولت خلينا نتفارق 
يمكن الفراق يعرفنا قيمه بعض شويه 
لكنى كنت غلطانه 
ومن جرحك ليا 
ديما بكون هربانه
الفراق آسيّ قلوبنا 
و مبقاش ينفع غير فراقنا 
انت كنت بالنسبالي رسول 
وجاى تهدينى الرساله 
و اللى اكتشفتوا انك فرعون 
وجاى من نفس السلاله
انا مبكتش على الاطلال 
وقت م قررت الترحال 
انا كنت ليك بتولك 
وكنت حبيبه بتصونك
طب ليه يارب 
ليه اذانى بالشكل ده 
و ايه وصلنى لكل دا 
انا كنت بقيالوا 
وهو اللى مش باقى
ليه كان فرعون 
مكنش مثلا موسي 
الموجه كانت عاليه اوى المرادى 
و ادينى حتى منولتش مُرادى 
انا ..
انا عاوزه اقولك حاجة ..
اسمحلى حتى اقولك كلمتين 
ياريت تسمعنى 
وياريت يعنى 
لو تفهمنى ..
اانا محتجالك ..
محتجالك اووى والله 
طب ارجع لحظه احضنك و امشي تاني 
طب تعالي نرجع و والله م هزعلك تاني 
وحشتني .. ورب العباد وحشتني. .
معقوله موحشتكش 
معقول قلبك يدق لغيرى !
طب خلينا نتعاتب 
بلاش المظلوم يتعاقب 
انا لسه بقيالك 
انا لسه بسرح الاقيك ف خيالي 
انت ديما مبتغيبش عن بالي 
كان نفسي تكونلي حلالي 
كنت هتكون اب لعيالي 
ليه قسيت عليا 
ليه الذنب اختار يكون ليا 
حياتى لسه فيها ضيك 
انا عمرى ف يوم م هبقى زيك 
 
كنت بايع ؟! 
ومكنتش سامع ..
جحود قلبك ظلم البرائه اللي جوايا 
مش قولت انك بتعشق هوايا
انا لسه حباك 
برغم القسوه اللي جواك
بالله متسيبش 
حياتك سايره مبتقفش 
وفي مكاني انا لسه واقفه مبتحركش 
خلينا نرجع زي زمان 
خلي روحنا في كل مكان
خليك ولو ل مره واحده ندمان
محاوط خوفي فيضان  
و جوايا مليون بركان
متقوليش غيرتك الايام 
انا في جوايا احساس بالآم
بسرد إليك دلوقتي كل الكلام 
و بقدملك اعتذار 
مهوش انذار 
لكن انا اسفه 
هيفضل حبك عايش ف قلبي 
هفضل فيك بناجي ربي 
و بكل ذره ضعف جوايا 
بقولك انا محتجالك 
و طول العمر هكون عيشالك 
حبك ف قلبي لسه موجود 
غلطت لما قولت حبك ملوش وجود 
وحشتني .. والله العظيم وحشتني