اهداء لام وروح الشهيد اسلام محمد حاتم يوسف ام الشهيد..... احكي قولي للشاعر: د. هاني السعداوي

2020-04-07 23:05:37


اهداء لام وروح الشهيد اسلام محمد حاتم يوسف
ام الشهيد..... احكي قولي
للشاعر: د. هاني السعداوي
هاتِ ورقك هات
قلمك هاتِ كل
الحبر هاتِ
وبإديكي الغاليه
دولا اكتبي
قصة حياتي
إوعي تنسي اي
كلمه قولتهالك
سجلي لحظة ماشفتك
صوّري يوم
ماعرفتك واكتبي
ساعة مماتي
انت شاهده ع التاريخ
ع العصركله من بداية
ماتولدت ولمّاعشت
ويوم مامُت
حتي لحظة لمّا جُم
شالوا رُفاتي
اوعي تنسي اي لحظه
اوعي تنسي اي كلمه
احكي بالتفصيل ياغاليه
كل حرف من حروف
العطف حَته اوعي
تنسي اي حِِته
كنت دايبه جوه
روحي كنت فيها
جو ه ذاتي

احكي يوم ماحلمت
بيكي والسما
تمطّر عليكي
كنت بجري بكل
عِزمي عايز اشيلك
اجري بيكي احتويكي
كنت قلبي كنت
روحي كنت ليه
العمر كله ياحياتي...
شعرك المبلول ضفايره
اللي فكّت واللي حسّت
لمّا جات تلعب في خدك
واللي لفّت كلها حوالين
رقبتك رحت واخدك
قمت حاضنك رحت ضمّك
وبإديّه قمت لفّك
وجيت مدفيكي
في عَباتى
احكي قولي
يوم مامُت بين ايديكي
كنت اموت لومره
أتاخر عليكي
كان ساعتها كنت
جايلك كنت بجري
عشان اقابلك
كان نهارها يبقي
فرحك كنت ميت
موت في حبك
من بعيد وانا
بجري شفتك
شفت فيكي
عمري كله اللي
حاضر واللي آتِِ.
انت برضه من بعيد
جايه تجري
قوام عليّه
كنت بجري عشان
اضمك بين ايديه

كنت بَبْكِيِ وبإيديكي
تمسحي الدمع في عنيّه
احكي قولي
قبل ايدي ماتلمس
ايدك جات ايدين
تانيه وخادتني............
عمري ماتمنيت
أسيبك لولا ايد
غادره طالتني............
ولمّا كنت خلاص
حجيبك جات سنين
عمري وخانتني...........
احكي قولي
وانت قاعده تصحّي فيّه
كنت فاكره ان روحي
لسه بيّه................
لمّا بالصدفه ياقلبي
فوق ايديكي
جات ايديه...............
احكي قولي
لمّا دمعك
من حرارته خلّي
خدي ياأمي بايش.......
لمّا شفتي ضحكه طالعه
من عينيه لمّا شفتِ جوه
عيني الدمع حايش ......
كنت بتنادي ياخلق
اسمعوني الحقوني
ابني والله لسه عايش ....
والحقيقه المرّه
يامّه إني مُتْ.........
بين ايدين الله تعالي
يامّه رُحتْ.........
احكي يامّه كل حاجه
كل شيء أنا قولتهولك
حتي قولي سرّي كلّه
اللّي ليكي يامّه بُحتْ....
هوّني يامّه عليكي
وكفياكي دموع
ياغاليه............
انت لِامّتَه ياحبيبتي
حتفضلي
للهَم شايله........
كل عمري راح
عشانك دانت امي
ياحياتي ونور عينيه,...
آآآآه ياامي كل خوفي
ان دمي يروح بلاش....
وانتوا راح تنسوا
اللي ماتوا بس
تفتكروا اللي عاش....

وانك انت حتقوليلهم
كان ضنايا وضي
عيني وراح ماجاش...
احكي قولي
إن توبك اتصبغ
احمر بدمي......
واترعَشَتْ رعشه
جامده قلتلك
ضُمّيني ضُمّي.....
ولمّا رُحت في
دنيا تانيه
شيلتي همّي.....
حتي لمّا رفعتِ راسي
سمعت صوتك جنب
ودني جاي يسَمّي.......
رغم ضعفك رغم
وهَنك قمتِ علي
لَحمِك تلمّي.......
احلي مافي المُوتَه
ديّه إنّي مُت عشانك
انت واني مت في
حضنك انت
وانت انت برضه أمّي.......




موضوعات ذات صلة