إيه حصل ... بقلم محمد أحمد حسن

2020-05-30 00:04:13


ايه حصل
__________
دا ياما بيكى بنفتخر
وضربنا 100 مليون مثل
يا صابره ايه بس العمل 
الشعب نايم فى العسل
ليله ونهاره فى الكسل
بالفول يا عينى بيتسطل
ومعاه يحبش بالبصل
على القهاوى بيجتهد 
ويعاود البيت للملل
تعبان ويشكى من العلل
ما كان كويس ايه حصل
والنعمه عاوز معجزه
وقوليلى فين بس الخلل
عاوزين فلوس 
زى التيوس 
من غير يا عينى ما نشتغل
بأمارة ايه ..
تحلم يا بيه 
دا انت من القعده بقيت
شايل سنم زى الجمل 
انفض تراب الهم قوم 
بطل هبل
فيه ألف عين ..
باصين عليك 
يتمنوا يحصلك شلل
ارجع ورا 
شوف الجدود 
زى الأسود 
بنوا مجد ليك 
والدور عليك 
ما تشد حيلك يا بطل 
اصل العيال 
اديك مثال 
دا ابن موزه وشلته
ابوه وعمه ووالدته 
واردوغان ودولته 
وكل كلب بهب فيك
واقف وسانن سنته 
علشان هياكلوا ف لحمتك
دا لو فيوم .. 
غمضت عينك او سهيت
ويعدها هاتقول يا ريت 
ما كنت نمت او اشتكيت 
دا الحل يا ابنى فى العمل
نبنى ونزرع فى الامل 
وينضرب بيك المثل 
____________________
 ابومهاود
محمد احمد حسن