خمسه كورونا وخمسه غياب للكاتب : ابو المجد البحيرى

2020-06-21 18:50:39


اجرى يا واد سنكر فى الباب
واقفلوا كل الشبابيك ياللا
وابعدوا بينا عن الأحباب
خمسه كورونا ويرحم ابونا
مات وما سابش وراه اصحاب
ولا عزّونا ولا افتكرونا ولا قالوا مالكم ياولاد
خمسه كورونا ف جلدنا خوفنا
عمرنا شوفنا الهجر وقايه
ابعد عنى وانا ابعد عنك
خيب ظنك فى اللى حدايا
لا تكلمنى ولا تعتبنى
ليه ما بشوفك ماشى ورايا
اصل جنازتى خمس تنفار
والباقى طار خايف ل اعديه
والله وعشنا وشفنا مرار 
ما تسلمش عليا يا بيه
خمسه كورونا محدش شافهم
لا بعدساته ولا بعنيه
حدش قال ان الله غالب
وانه يطالب نرجع ليه
خمسه كورونا يبهدلوا فينا
وخلّوا الكل لبد فى الدار
حتى الصوت العالى اتخبى
وخش مكانه وجع ومرار
ضاعت منا البهجه وخوفنا
وشوفنا الضعف مهوش بهزار
ياللا وفكّر خمسه ف ربّك
ولا تستنى مصل الروس
قوله ياربى انا غلبان
واللى انا فيه دا كله كابوس
ارفع عنا غضبك دا احنا
غلابه يارب ارحمنا و حوش
#ابوالمجدالبحيرىبياع_الفل




موضوعات ذات صلة