الماضي/ بقلم هدى النحاس

2020-07-12 23:29:19


........الماضي
إبتديت  أركن فى روحي
 جوة أشكال السكات 
وإبتديت  أرهن طموحي 
وأعتكف جوه اللي فات 
بأعترف أنا كنت حاله 
نبضها مركز هالات

كنت صافيه وتلقائيه
كنت ف الأحلام غبيه
كنت عاشقه الإنسانية 
والنقاء  أصل  وثبات 

فكري عمره ما عدي مني 
كنت حساك  حته مني 
كنت ساكن  شوق ونني 
كنت جوه عينيك ببات   

إنطفت شمعه أمالي 
ضَلمت  سَلمت حالي 
كنت فارق كنت غالي 
فجأه سرسبت الحاجات

ليه يا وقت بتجري بيا
ليه تخلي دموع عينيا 
تروي روحي تشق فيا 
تِلوي  جوايا   الآهات

فترة  عدت حيرتني
كات كفيلة  ودمرتني 
عذبتني      وغيرتني    
نفسي  أنسي  الذكريات

روح كفاية أبعد وسيبني
لو صحيح جواك حبيبني
قدري مكتوب راح يصيبني
لو يكون مجنون  ساعات

دارت   الأيام   وعدت
خطوه رجعت خطوة مَدًت  
قسوتك لضلوعي  هَدت
الحنين    والامنيات

الوجع    بيهز     فيا
 رعشه  بتسيطر  عليا 
ذكري رايحه وذكري جايه 
والشعور أصبح  فتات 

الوريد يصرخ فيه نار 
 إنتفاضه    وإنهيار  
ثورة قامت فى إنتظار 
دفن حبك أصله مات

لسه عايشه  إستحالة!!
خدت درس وميت علامه 
نار  بتحرق  ألف  شامه
وإتمحت  أغلي  حكايات
                                  ✍ هدى النحاس